Jæja best að skrifa smá færslu. Langt síðan síðast, vorum meira að segja á Íslandi þá.

Við erum bæði byrjuð á nýjum önnum i skólanum. Hjalti er núna á þessari fyrri vorönn í tveimur áföngum (sem hann getur kannski lýst betur seinna). Ég byrjaði núna á mánudaginn persónuleikasálfræði. Reyndar er ég búin að taka áfanga á Íslandi um allar kenningarnar þannig að ég fæ það að mestu metið og þarf því ekki að taka eitt heimapróf sem á víst að vera ansi snúið. Það sem ég geri í þessum áfanga er að halda einn fyrirlestur um eina kenninguna með tveimur strákum úr bekknum. Svo fæ ég “klient” – einhver ókunnug manneskja sem ég þarf að leggja fyrir persónuleikapróf og frávarpspróf og svo skrifa út frá kenningunum um hvernig persónuleiki hennar er. Þetta þarf ég svo að sýna “klientinum” mínum til að athuga hvort að eitthvað vit sé í þessari persónuleikadæmingu minni.

Svo fór ég í aðgerðina mína í gær. Það gekk svosem vel. Var smá stressuð fyrir, en það var ósköp vel hugsað um mig, Svíarnir eru svo aumingjagóðir og vorkenna manni svo mikið. Þeir skáru burt helling af þessum vírus, meira en hvað hefði sést á myndinni. Mér líður bara núna eins og maður sé með slæma hálsbólgu, vont að kyngja og svoleiðis. En ég má tala, eins og ég treysti mér til. Svæfingin fór bara vel í mig til að byrja með, bara smá ringluð og máttfarin. En svo eftir að við gengum heim, byrjaði mér að verða óglatt. Mér leið eins og ég væri bílveik, mátti ekki hreyfa mig og ekki hugsa um hreyfingu, hvað þá að sjá hreyfingu eins og í sjónvarpinu. Varð bara að liggja með lokuð augu og einbeita mér að hreyfa mig ekki eða hugsa um hreyfingu. Öll hljóð trufluðu einbeitinguna mína eins og að Hjalti var að bryðja hálsbrjóstsykur. Svo á endanum kom bara sú litla næring sem ég hafði fengið mér upp og þá leið mér aðeins betur. Núna líður mér bara eins og ég sé með hálsbólgu og er illt í öllum líkamanum. En ætla í skólann í dag því að kennarinn sagði að þetta væri svo mikilvægur tími.

Versta er að læknirinn sagði að þeir sem fara í svona aðgerðir þurfa oft að fara aftur því að maður læknar náttúrulega ekki vírus.

Jæja ætla að fara í tíma, heyrumst seinna.